راهێنه‌ری‌ هه‌ڵبژارده‌ی‌ ئیتاڵیا رۆبه‌رتۆ دۆنادۆنی‌ پێكهاته‌ی‌ هه‌ڵبژارده‌كه‌ی‌ بۆ یۆرۆی‌ 2008 ئاشكرا ده‌كات‌و پاش ماوه‌یه‌كی‌ زۆر له‌ دابڕان جارێكیتر دێل پیرۆ بۆ هه‌ڵبژارده‌كه‌ی‌ بانگهێشت ده‌كاته‌وه‌.

ئاژانسه‌كان: له‌گه‌ڵ ئه‌وه‌ی‌ به‌شێوه‌یه‌كی‌ فه‌رمی‌ رانه‌گه‌یه‌ندراوه‌، رۆژنامه‌ی‌ تۆتۆ سپۆرتی‌ ئیتاڵی‌ هه‌ستاوه‌ به‌بڵاوكردنه‌وه‌ی‌ ناوی‌ یاریكه‌رانی‌ پێكهاته‌ی‌ هه‌ڵبژارده‌ی‌ ئیتاڵیا كه‌ له‌لایه‌ن رۆبه‌رتۆ دۆنادۆنی‌ راهێنه‌ری‌ هه‌ڵبژارده‌كه‌وه‌ دیاریكراون بۆ جامی‌ نه‌ته‌وه‌كانی‌ ئه‌وروپای‌ 2008 . كه‌ بڕیاره‌ له‌7/6 ئه‌مساڵدا به‌هاوبه‌شی‌ له‌هه‌ردوو وڵاتی‌ نه‌مسا‌و سویسرا به‌ڕێوه‌بچێت. پاش ئه‌وه‌ی‌ به‌درێژایی‌ ساڵی‌ رابردوو دۆنادۆنی‌ دێل پیرۆی‌ یاریكه‌ری‌ یانه‌ی‌ یۆڤانتۆسی‌ له‌ پێكهاته‌ی‌ ئیتاڵیا دور خسته‌وه‌، به‌ڵام پاش ئه‌وه‌ی‌ له‌وه‌رزی‌ ئه‌مساڵدا توانی‌ ئاستێكی‌ به‌رز پیشان بدات، دۆنادۆنی‌ ناچاركرد كه‌ بیگه‌ڕێنێته‌وه‌ بۆ ریزی‌ هه‌ڵبژارده‌كه‌ی‌.
رۆژنامه‌ی‌ ناوبراو ئه‌وه‌شی‌ ئاشكراكردووه‌، كه‌ هێڵی‌ هێرشبه‌ری‌ هه‌ڵبژارده‌كه‌ پێویستی‌ به‌یاریكه‌رێكی‌ تره‌ كه‌ هێشتا راهێنه‌ری‌ ناوبراو ئاشكرای نه‌كردووه‌. تاكه‌ پاڵێوراو بۆ ئه‌و شوێنه‌ش فلیپۆ ئینزاگی هێرشبه‌ری‌ یانه‌ی‌ ئه‌یسی‌ میلانه‌، كه‌ له‌یارییه‌كانی‌ ئه‌م دواییانه‌ی‌ یانه‌كه‌یدا توانیویه‌تی‌ ئاستێكی‌ به‌رز پیشانبدات. جێگه‌ی‌ ئاماژه‌یه‌ له‌ هێڵی هێرشبه‌راندا كاسانۆو یاكوینتا دورخراونه‌ته‌وه‌، وه‌ هێڵی ناوه‌ندیش پێویستی‌ به‌ تاكه‌ یاریكه‌رێكه‌ ئه‌ویش چاوه‌ڕوان ده‌كرێت یاریكه‌ری‌ یانه‌ی‌ رۆما ئه‌كویلانی‌ پڕی بكاته‌وه‌، ئه‌مه‌ش پێكهاته‌ی‌ هه‌ڵبژارده‌كه‌یه‌:
گۆڵچی‌: بۆفۆن، ئیمیلیا، تۆڵدۆ
به‌رگری‌: كه‌نه‌ڤارۆ، پانۆچی‌، ئۆدۆ، ماتێرازی‌، بارزاگلی‌، كیلینی‌، زامبرۆتا، گرۆسۆ.
ناوه‌ند: گاتوزۆ، پێرلۆ، ئه‌مبرۆسینی‌، دێ‌ رۆسی‌، پێڕۆتا، ئه‌كویلانی‌، كامۆرانیزی‌.
هێرشبه‌ران: دێل پیرۆ، بۆرێللۆ، دی‌ ناتالی‌، تۆنی‌.